The Best Way to Learn English


The Best Way to Learn English



طبعا كثير سمعنا عن ناس بتدعي ان الطريقة الفلانية هي أفضل طريقة لتعلم اللغة وان فيه طريقة سحرية هتخليك لبلب في اللغة بمجرد ما تستخدمها وأنا دلوقتي برضو هقولكم على أحسن طريقة لتعلم اللغة بس طريقتي مختلفة شوية.

أولا مفيش طريقة واحدة هي الأفضل! ايه دة اومال فيه كم طريقة؟! فيه طرق أد عدد البشرية كلها! يعني حوالي 6 مليار طريقة كدة! دة ازاي بقى؟! دة عشان الطريقة الأفضل بتكون الطريقة الأفضل للشخص مش في المطلق. طب أنا دلوقتي بقى أعرف الطريقة دي ازاي؟! الطريقة دي انت أصلا بتعملها من غير ما تاخد بالك بس للأسف بتنسى تعملها في الانجليزي.

مثلا الناس اللي بتحب الكورة جدا بتلاقيها عارفة كمية معلومات رهيبة في الكورة وممكن يحضر دكتوراة فيها ودة عشان طبعا هو بيكون مبسوط وهو بيتفرج على ماتشات أو بيسمع تحليل أو بيقرأ أخبار عنها.

طب ليه متنقلش الحاجة اللي انت بتحبها في انك تحسن لغتك؟ يعني مثلا لو انت بتحب الأفلام وبتحب الأفلام الأجنبي كمان وطول عمرك بتتفرج عليها بترجمة عربي ومش بتفكر تسمع أو تركز أصلا, دلوقتي ممكن تستخدم 
حبك للأفلام دة في انك تحسن لغتك بشكل كبير. طب ازاي؟

دلوقتي ممكن تنزل أي فيلم انت بتحبه من النت وتنزل ترجمة كمان بس المرة دي بالانجليزي بقى! طب ازاي 
يعني هنزل ترجمة انجليزي على فيلم انجليزي برضو؟ دة عشان يكون عندك وعي أكثر بالكلام اللي بيتقال اللي مش بتاخد بالك منه ومش بتسمعه. دة غير ان لو فيلم انت عارفه أصلا وحافظه ممكن تستخدم الموضوع دة في انك تنزل ترجمته بالانجليزي وتتفرج على فيلم انت بتحبه بس المرة دي هتوقف عشان تشوف معاني الكلام اللي بيتقال اللي انت مش فاهم معناة. ممكن الموضوع يكون مرهق شوية في الأول بس مش انك تتفرج على فيلم انت بتحبه أصلا أحسن بكثير من انك تقرأ مقال ملوش أي علاقة بحاجة انت بتحبها؟! فبكدة هتكون استغليت الحاجة اللي انت بتحبها في تحسين لغتك.

ممكن تنزل الترجمة من الموقع دة

طب أنا يا سيدي مبحبش الأفلام, أعمل ايه؟ اعمل الصح! فعلا اعمل اللي انت بتحبه. يعني نرجع لمثال الكورة لو انت بتحب الكورة شوف فيديوهات عن الكورة مع تعليق إنجليزي وركز فيها ودلوقتي على يوتيوب فيه إمكانية انك تقرأ الكلام اللي بيتقال كمان ممكن تقرأ مقالات عن الكورة وبكدة هتكون مستمتع وبتحسن لغتك من غير ما تاخد بالك.

الموضوع دة كبير جدا وأكيد هيكون لينا كلام كتير عنه تاني بس لحد المرة الجاية ممكن تخشوا على الموقع دة هتلاقوا عليه فيديوهات مع الكلام مكتوب بالمعنى كمان وغالبا هتلاقوا فيديوهات عن حاجة انتوا بتحبوها.
دة لينك الموقع


يلا نخلي تحسين لغتنا هوايتنا!
Share:

0 التعليقات:

Post a Comment

Popular Posts

Contact us

Name

Email *

Message *

Find Us On Facebook

Zatoona Calendar

Quote of the Day

Website visits

Do you find us helpful?

Alexa Ranking