إزاي تقضي على شعور الملل اللي بيجيلك كل مرة تبدأ تتعلم إنجليزي




الملل مشكلة كبيرة بتواجه متعلمين كتير في بداية أو منتصف طريقهم في تعلم اللغة الإنجليزية . الملل هو اللي بيخليهم يقفوا بعد ما كانوا في منتهى الحماس في بداية طريقهم نحو التعلم . كم مرة قعدت مع نفسك وقولت لازم أتمكن من اللغة وبالفعل بدأت تذاكر أون لاين وتاخد كورس وبعد كده وقفت وزهقت وبدأ كل اللي إتعلمته يتنسى واحده واحده وأصبح كل الوقت اللي انت قضيته في طي النسيان وملوش لازمة . 

وانت بتقرأ دلوقتي بتقول :
-أيوة فعلا .. 
بس برضه ..
إزاي أقضي على الملل ؟ 

هجاوبك على سؤالك حالاً بس هسألك الأول ليه مش بتزهق من الأكل والشرب ؟ ليه مش بتزهق من اللعب ؟ ليه مش بتزهق من القعاد ساعات على الفيسبوك وواتس آب ؟ فكر وقولي .. 


فكرت ؟ 

أيوة مظبوط عشان دي عادات ممتعة انت إتعودت عليها مع الوقت وشغفك بيها أصبح قوي جدا للدرجة اللي تخليك مش بس مش بتزهق لأ ده انت حياتك من غيرهم صعبه جدا وشبه مستحيلة ! 

لكن انت بتتعامل مع الإنجليزي كمادة أو كشغل .. محدش بيحب المذاكرة أصلا .. لا أنا ولا أنت والله ! ومحدش بيبقا شغوف ناحية شغله إلا لو بيديله متعه معنوية كبيرة أومقابل مادي مجزي  غير كده برضه عمرنا  ما هنحب الشغل وبالتالي التعامل مع الانجليزي كأنه عبئ زي المذاكرة أو الشغل عمره ما هيخليك تكمل ودايما هتزهق وهتقف! 

الحل هو إن الإنجليزي يبقا عادة .. عادة ممتعة .. عادة مبتقدرش توقفها لإن يومك مش بيكمل من غيرها . 

هتقولي إزاي برضه ؟! 

هقولك الإنجليزي يمكن صعب عليك يكون عادة لوحده ..بس إيه رأيك لو ربطناه بعاداتك الموجودة حاليا .. 

الطريقة الأولى 

بتحب الفيسبوك ؟ 
إشترك في جروبات لغتها هي الإنجليزي هتلاقيهم طول اليوم بيتكلموا في كل حاجه .. أخبار العالم .. نكت بالإنجليزي .. نقاشات .. خناقات على أحسن مغني .. خناقات سياسية .. كل المواضيع اللي المصريين بيتكلموا فيها على الفيسبوك عندك على الHome page الاجانب برضه بيتكلموا فيها على جروباتهم .. خش وإتعلم ومارس اللغة براحتك وسط مجتمع كله بيتكلم انجليزي وبس ! 

لينكات للجروبات اللي بتكلم عنها 

لو بتحب الكورة ده جروب فيسبوك لازم تشترك فيه 
https://www.facebook.com/groups/officialtrollfootball/?fref=nf

لو بتحب النكت والهزار والفيديوهات الكوميدية 
https://www.facebook.com/groups/FunnyJokesNVideos/

لو بتحب الشات  
https://www.facebook.com/groups/inglishchat/

ده ممكن كمان تدخل على جروبنا لتعليم الإنجليزي بطريقة ال Facebook posts  ودي عبارة عن إننا بنتكلم عن كل ما يخص المصريين بس بالإنجليزي وبنخليك تمارس اللغة يوميا 

https://www.facebook.com/groups/zatoonetelengeelzy/

طريقة تانية تقدر تربط بيها الإنجليزي بعادتك وهو إنك ممكن تذاكر وانت بتعمل حاجه بتحبها .. 
مثلا تحمل برنامج زي Anki من هنا 
http://gsurl.in/2BGk

وده برنامج مسلي جدا لحفظ كلمات اللغة الانجليزية وتقدر تحمله على الكومبيوتر بتاعك أو السمارت فون وفكرته هو ربط الكلمات بالصور والصوت والفيديو .. تقدر تستخدمه وإنت بتعمل أي حاجه بتحبها وبأقل مجهود انجليزي .. 

على سبيل المثال لو بتحب تشرب القهوة الصبح أفتح البرنامج من موبايلك و أتعلم كام كلمة لحد ما فنجال القهوة يخلص ! وهكذا كل يوم  . 
لو بتروح الشغل  أو الجامعه أو المدرسة في المواصلات أو في العربية مع حد  وبتحب تسلي نفسك باللعب في الموبايل أو تسمع مزيكا فممكن تسمع مزيكا انجليزي وتفتح التطبيق وتتعلم كل يوم كلمات جديدة من استغلال وقت فراغ كان بيضيع في ملل بقيت بتستغله في المتعه والتعلم . 


الطريقة الثالثة 

لو فعلا عايز متزهقش ، اتعلم الانجليزي فمكان انت بتحبه . مش شرط في سنتر أو في البيت .. لو بتحب مثلا تقعد على كافيه معين اقعد فيه واقرا مجلة بالانجليزي .. أو اسمع اغاني بالإنجليزي واقرأ كلماتها .. أو افتح فيسبوك وأدخل على الجروبات الي انت بتحبها بالإنجليزي . 


الطريقة الرابعة 
هي تنويع مصادر التعلم .. انت بتزهق كل مره عشان بتتعلم من مصدر واحد .. من كتاب واحد .. من مستر واحد ! 

غلط .. 



دي قايمة بأفضل قنوات على ال YouTube 




ودي قايمة بأفضل مواقع على النت 



وبكدة انت معاك مصادر مختلفة للتعلم تقدر كل يوم تسكتشف  مصدر جديد فيهم وتنوع في طرق التعلم  اللي تقدر تخليك تحول الانجليزي لعادة ممتعه مش مجرد عبئ مذاكرة وبالتالي متزهقش ويبقا قضينا على أكبر مشكلة بتواجهك وبتواجه ناس كتييير !

 لو عجبك موضوعنا ياريت تعمل شير وتفيد أكبر عدد ممكن من الناس ! 


Share:

0 التعليقات:

Post a Comment

Popular Posts

Contact us

Name

Email *

Message *

Find Us On Facebook

Zatoona Calendar

Quote of the Day

Website visits

Do you find us helpful?

Alexa Ranking